Termodynamikk 2

Termodynamikk for blandingar og blandingsprosessar. Fuktig luft, klimatisering. Eksergi, irreversibilitet, eksergianalyse. Kjemiske reaksjonar: Forbrenning, masse- og energiomsetnad, brennverdi, flammetemperatur, eksergi og irreversibilitet. Termodynamiske samanhengar; likningar som gjev samanheng mellom målbare eigenskapar (masse, volum, trykk, temperatur) og eigenskapar som ikkje kan målast (energi, entalpi, entropi m.m.). Termodynamikk for reelle gassar, gass- og væskeblandingar. Termodynamisk likevekt; kjemisk likevekt, ufullstendig forbrenning, danning av forureiningar; likevekt mellom faser. Energi, resursar og berekraft.

Kunnskapar: Studenten får kunnskap om: Inneklima, energibruk. Termisk kraftproduksjon. Forbrenning og forbrenningsprodukt. Prosessar for næringsmiddelteknologi. Gassprosessering, naturgassteknologi. Energiutnytting. Studenten får innsikt i: - Termodynamikk for blandingar av ideelle gassar, inkludert fuktig luft. - Forbrenning og andre reaksjonar. - Termodynamikk for reelle gassar og blandingar av relle gassar. - Termodynamiske samanhengar, eigenskapar og data. - Eksergianalyse. - Kjemisk jamvekt og fasejamvekt. Ferdigheiter: Studenten skal vere i stand til å: - Finne termodynamiske eigenskapar for aktuelle stoff og blandingar. - Definere og analysere termodynamiske system ved hjelp av hovudsetningane. - Setje opp balansane for masse, energi, entropi og eksergi for tekniske system og finne dei storleikane som inngår. - Bruke teorien til å løyse praktiske, ingeniørmessige problem. - Bruke teorien til å forstå prosessar i natur og omgjevnader. - Arbeide vidare med energitekniske og andre termodynamiske prosessar. Generell kompetanse: Studenten skal ha forståing for: - Korleis ein brukar termodynamikk for gamle og nye problem. - Korleis tabellar, diagram og data-program er laga og skal brukast. - At termodynamikken er generell slik at den same basiskunnskapen går att i ulike tekniske innretningar og prosessar. - Samanhengar mellom termodynamikk og berekraft.

Førelesingar. Sjølvstudium. Rekneøvingar (individuelt eller i grupper) basert på Termodynamikk 1 og 2. Bruke rekneark, Matlab eller Python for modellar og utrekningar.