Norsk 2 (1-7) emne 2: Skriving og tekstkulturer

I dette emneområdet blir moglegheiter og utfordringar innafor skriftlege sjangrar og teksttypar utforska, og det blir arbeidd med analyse og vurdering av elevtekstar frå ulike trinn. Studentane si eiga skriving blir også tematisert, m.a. gjennom ulike former for respons og vurdering, revisjon og utprøving. Samanhengar mellom lesing og skriving, og mellom munnleg og skriftleg bruk av språket, blir vektlagt også her. Målet er at studentane som norsklærarar skal kunne arbeide kreativt og systematisk med skriving og leggje til rette for varierte skrivesituasjonar, slik at elevar med ulike føresetnader kan utvikle tekstkompetansen sin.
Sentrale tekstar frå norsk skjønnlitteratur og sakprosa blir sette inn i ein historisk samanheng, og ulike teksttypar frå ulike medium blir studerte og vurderte. Det blir arbeidd med adaptasjon av barnelitterære tekstar til filmmediet, og både film, teater og medietekstar blir sette inn i ein norskfagleg kontekst. Studentane skal også få kunnskap om språkleg kommunikasjon i ulike medium og teoretisk kunnskap om samansette og digitale tekstar.

Kunnskapar
Studenten
- forstår og kan diskutere sentrale teoriar om skriving
- kjenner til teoriar om samansette tekstar
- kan forklare kva som kjenneteiknar språkleg kommunikasjon i ulike medium
- har utvida kunnskapar om munnlege og skriftlege sjangrar og har innsikt i korleis elevar frå 1.-7. trinn utviklar kunnskapar om desse og kan nytte dei i eige tekstarbeid
- forstår og kan diskutere kva som skjer når ein barnelitterær tekst vert overført frå eit medium til eit anna (adaptasjon)
- forstår og kan diskutere kva for funksjonar skriving har hatt og har i kulturen vår
- har inngåande kjennskap til teoriar om skriving, særleg knytt til den andre skriveopplæringa

Ferdigheiter
Studenten
- meistrar begge målformene
- kan organisere og drive tilpassa skriveopplæring for 1.-7. trinn etter fagleg grunngitte prinsipp, også for elevar med norsk som andrespråk
- kan bruke språk- og tekstkunnskap aktivt i rettleiing av elevar
- kan leggje til rette for den munnlege språkutviklinga til elevane
- kan rettleie elevar i arbeidet med tekstar slik at dei kan utvikle seg sjølve, skaffe seg kunnskapar og førebu seg for aktiv deltaking i offentlege rom og samfunnet som heile
- kan setje sentrale norske tekstar inn i ein historisk samanheng, tolke dei og sjå dei i lys av nordisk og annan internasjonal litteratur
- kan lese, analysere, tolke og vurdere samansette tekstar og setje dei inn i ein større kulturell og offentleg samanheng

Generell kompetanse
Studenten
- kan vurdere eigen praksis som norsklærar og grunngi vurderingane
- har eit medvite forhold til korleis samtalen mellom lærar og elevar, og samtalen elevane imellom, kan fungere som reiskap for læring

Studentane vil møte varierte arbeidsformer og læringsaktiviteter. Undervisninga vil veksle mellom førelesingar, diskusjonar, seminar- og verkstadarbeid. Undervisninga vil i stor grad bli seminarbasert, der det blir arbeidd konsentrert med eit tema i to til tre veker, med framlegg til slutt. Studiet fordrar derfor stor eigenaktivitet av studentane.

Det er ein føresetnad at studentane tileignar seg lærestoff gjennom sjølvstudium utanom den organiserte undervisningstida, også gjennom arbeid i grupper og gjennom læringsplattforma. Studentane skal gjennom heile studiet bruke språket aktivt i skriftleg og munnleg kommunikasjon med medstudentar og faglærarar. Vidare er det forventa at studentane brukar biblioteket aktivt og møter førebudde til undervisninga.